Tacaíonn stampaí nua Éireannacha le Feasacht ar an Ailse
22 Meán Fómhair 2023
Tá dhá théama sna stampaí nua:
Neart sa Phobal, a léiríonn an réimse leathan seirbhísí cóireála agus cúraim trína bhfaigheann othair le hailse agus a ndaoine muinteartha tacaíochtaí a bhfuil géarghá leo, agus iad ag maireachtáil le diagnóis ailse agus ina diaidh, agus an chumhacht a bhaineann le nascadh agus le fanacht i dteagmháil lena chéile.
Dóchas sa Taighde, a aithníonn infheistíocht ollmhór i dtaighde sna suíomhanna cóireála agus cúraim araon, rud a chinntíonn go bhfaigheann othair na torthaí is fearr. Is timpeallacht a ghluaiseann ar aghaidh go tapa é seo agus is iontach na feabhsuithe a bhí le brath ag othair le 60 bliain anuas.
Clúdaíonn an dá stampa 'N' postas litreach laistigh d'oileán na hÉireann agus ba í gníomhaireacht deartha Bhaile Átha Cliath, Zero-G, a dhear iad. In éineacht le clúdach Chumhdach Chéad Lae a dearadh go speisialta, tá siad ar fáil ar líne ag www.anpost.com/shop (le seachadadh saor in aisce) agus ag rogha oifigí poist ar fud na tíre.
Nuair a chuir Cumann Ailse na hÉireann tús le Lá Lus an Chromchinn den chéad uair (in 1986), níor tháinig ach triúr as gach deichniúr Éireannach slán ó dhiagnóis ailse. Sa lá atá inniu ann, is 6 as 10 a bhíonn ann agus tá sé sin amhlaidh mar thoradh díreach ar an dul chun cinn a rinneadh i dtaighde ar an ailse.
Chuir Averil Power fáilte roimh an dóchas a léirítear i ndearadh na stampa: "A bhuíochas don dul chun cinn sa taighde, tá os cionn 200,000 duine anois, in Éirinn sa lá atá inniu ann, a bhfuil diagnóis ailse acu agus a mhaireann ina diaidh. Tá roinnt ailsí cosúil le hailsí fola na luathóige a bhíodh beagnach i gcónaí marfach roimhe seo, agus atá anois inleighis den chuid is mó. Maireann 9/10 duine freisin trí ailse chíche, phróstatach agus uiríoch. Déanann na stampaí seo ceiliúradh ar na feabhsuithe ar luathdhiagnóis agus ar chóireálacha nua a d'fhág gur féidir é sin a dhéanamh. Léiríonn siad freisin na hurfhuascailtí atá déanta ag taighde maidir le hailse a chosc agus caighdeán beatha níos fearr a thabhairt do mharthanóirí. Gné ríthábhachtach eile is ea an dóchas. An dóchas nach bhfaighidh aon duine bás ón ngalar amach anseo agus go mbeidh saol fada, sásúil acu siúd atá beo le hailse agus ina diaidh agus go mbeidh caighdeán iontach beatha acu."
Luaigh Averil Power éachtaí Chumann Ailse na hÉireann: "Tá stair bhródúil ag Cumann Ailse na hÉireann ag déanamh infheistíocht i dtaighde ailse. Ó 1979 i leith, mar gheall ar thacaíocht dhochreidte ár ndeontóirí, tá breis agus 450 tionscadal taighde maoinithe againn arb ionann iad agus infheistíocht ollmhór €60 milliún chun feabhas a chur ar shaol gach duine atá thíos leis an ailse. Ós muid an maoinitheoir deonach is mó ag Taighde ar an Ailse i bPoblacht na hÉireann táimid tiomanta do thaighde comhoibríoch ar an ailse a bhunú agus tacú leis, agus cliniceoirí, altraí, gairmithe sláinte gaolmhara, eolaithe saotharlainne, agus taighdeoirí eile a thabhairt le chéile chun luas na fionnachtana a mhéadú."
Dúirt David McRedmond "Comórann Lá Domhanda Taighde ar an Ailse ar an 24 Meán Fómhair an feachtas i dtreo cóireáil ailse cheannródaíoch den chéad scoth, rud a fhágann go bhfuil borradh dochreidte ann chun feabhas a chur ar shaol na ndaoine atá buailte ag an ailse, anois agus do na glúnta atá le teacht. Is féidir linn go léir tacú leis an obair ríthábhachtach seo trí fheasacht a ardú, síntiúis a dhéanamh nó obair dheonach a dhéanamh, d’fhonn rátaí marthanais a fheabhsú agus a chinntiú go mbíonn an cúram is fearr is féidir ag ár dteaghlaigh, ár gcairde agus ár gcomhghleacaithe, a bhíonn beo tríd an ailse agus ina diaidh."
Spreagann An Post custaiméirí cabhrú le feasacht a ardú trí úsáid a bhaint as na stampaí Taighde agus Cúram Ailse, agus as cárta poist saor in aisce i ngach príomhoifig poist chun nóta pearsanta a sheoladh chuig duine a bhfuil diagnóis ailse acu nó a tháinig slán uaithi, nó chun tacú le duine muinteartha atá ag obair i gcúram sláinte cóireáil ardchaighdeáin agus cúram praiticiúil a sholáthar.
Nótaí don Eagarthóir ó Chumann Ailse na hÉireann:
I mí na Bealtaine, d'fhógair Cumann Ailse na hÉireann comhpháirtíocht straitéiseach nua le Coláiste na Tríonóide, Baile Átha Cliath agus Ospidéal San Séamas a ceapadh chun clár den scoth a fhorbairt do dhaoine atá thíos leis an ailse in Éirinn. Mar thoradh ar an gcomhoibriú cúig bliana, infheisteoidh an Cumann €4.5 milliún i roinnt cláir eiseamláireacha ar leith atá dírithe ar shamhail nua de chúram ailse a chur ar fáil d'othair in Éirinn.
Trí infheistíocht a dhéanamh in Institiúid Ailse San Séamas (TSJCI) i gColáiste na Tríonóide, tá sé mar aidhm ag Cumann Ailse na hÉireann dlús a chur le taighde ailse a aistriú ina chóireálacha nua agus ina thacaíocht níos fearr d'othair. Déanfaidh an chomhpháirtíocht seirbhísí Chumann Ailse na hÉireann a chomhtháthú isteach i gconair an ospidéil agus cuirfear feabhas ar eispéireas na n-othar trí chomhoibriú níos fearr a chinntiú le hothair trí réimsí taighde, trialacha cliniciúla ailse, cúram cliniciúil agus oideachais.
Ba é an clár BREAST-PREDICT an infheistíocht aonair is mó i dtaighde ailse a rinne Cumann Ailse na hÉireann riamh le 60 bliain anuas. Bunaíodh an tIonad Taighde Comhoibríoch ar an Ailse seo ar luach €7.5 milliún in 2013 agus bhí os cionn 50 taighdeoir páirteach ann agus iad ag obair le chéile ar fud na hÉireann i dtreo na sprice comónta leigheas pearsantaithe ailse bhrollaigh a thionscnamh. Bhí iliomad éachtaí ag BREAST-PREDICT agus earcaíodh níos mó ná 3,400 othar in 9 staidéar cliniciúil, agus forbraíodh 24 tástáil theiripeacha agus dhiagnóiseacha nua. Ceann de na forbairtí is suntasaí ó BREAST-PREDICT is ea an fhianaise ar an tionchar a d'fhéadfadh a bheith ag comhoibriú taighde, ag réiteach an bhealaigh i gcomhair tionscnaimh don todhchaí.
Is ceann de na tionscnaimh sin é Precision Oncology Ireland (POI), an clár aistritheach taighde ar an ailse is mó sa tír atá á chómhaoiniú ag Fondúireacht Eolaíochta Éireann. Is cuibhreannas é POI de 5 Ollscoil na hÉireann, 6 Charthanas Éireannacha, agus 7 gcomhpháirtithe tionscail a bhfuil sé mar aidhm acu diagnóisic agus teiripic nua a fhorbairt le haghaidh cóireáil ailse phearsantaithe. Tá an Cumann bródúil a bheith ina chomhpháirtí le Precision Oncology Ireland, ag cómhaoiniú go díreach fhorbairt modhanna nua chun a aithint cé na cóireálacha ailse is fearr a oibreoidh i gcoinne ailse chíche bunaithe ar a gcomhdhéanamh géiniteach aonair agus ar an gcineál ailse a bhíonn acu. Is gluaiseacht é seo i dtreo leigheas níos pearsantaithe a cheadaíonn tuiscint níos fearr ar ghnéithe uathúla an ghalair agus ar fhreagairtí cóireála i ndaoine aonair a bhíonn buailte ag an ailse. Tá taighde POI fós ar siúl, ach beidh idir thástálacha diagnóiseacha d'ailse agus drugaí nua agus teaglamaí cóireála feabhsaithe i measc na dtorthaí a bhfuiltear ag súil leo ón gclár taighde seo.
A bhuí leis an dul chun cinn atá déanta sa taighde, tá os cionn 200,000 duine ina gcónaí in Éirinn anois sa lá atá inniu ann a bhfuil diagnóis ailse acu agus a mhaireann ina diaidh. Sprioc thábhachtach de chuid Chumann Ailse na hÉireann is ea a chinntiú go mbíonn saol sona sásúil ag daoine atá buailte ag an ailse. Féachann taighde marthanóireachta le feabhas a chur ar chúram agus ar chaighdeán na beatha a bhíonn ag daoine a mbíonn ailse orthu agus a thagann slán uaithi. Maoiníonn Cumann Ailse na hÉireann taighde marthanóireachta i réimsí amhail cáilíocht agus eispéireas na cóireála agus an chúraim, éifeachtaí síceasóisialta ailse agus a cóireáil, féinbhainistiú, faisnéis agus litearthacht sláinte, riosca géiniteach, agus comhairleoireacht chomh maith le riachtanais fhisiciúla agus phraiticiúla.
Ceann de na staidéir sin is ea Tionscnamh Sláinte na mBan, tionscnamh ceannródaíoch a bhfuil sé mar aidhm aige aghaidh a thabhairt ar bhearna sheanbhunaithe maidir le hairíonna agus fo-iarmhairtí a aithint agus a bhainistiú do mhná a d'eascair as a n-ailse agus a gcóireáil. Tá sé mar aidhm ag Tionscnamh Sláinte na mBan sláinte agus folláine a fheabhsú do mhná a tháinig slán ó ailse ag gach céim dá n-aistear ailse trí chlinicí píolótacha a bhunú atá lonnaithe i gCorcaigh, Baile Átha Cliath agus Gaillimh. Go dtí seo, tá maoiniú beagnach €1 milliún euro curtha ar fáil ag Cumann Ailse na hÉireann do na clinicí sin chun tacaíochtaí a bhfuil géarghá leo a chur ar fáil do mhná atá buailte ag an ailse ar fud na tíre.
