.jpg)
Gníomhú ar son na hAeráide
Tá freagracht orainn ár n-oibríochtaí a dhícharbónú, éifeachtúlacht acmhainní a uasmhéadú, agus tacú le haistriú na hÉireann chuig todhchaí ísealcharbóin.
Forbhreathnú
Tuigimid go maith tionchar an athrú aeráide agus an phráinn a bhaineann le gníomhú ar son na haeráide. Agus é d'aidhm againn lorg a fhágáil a mbeimid bródúil as, táimid tiomanta do ghlanastaíochtaí carbóin nialasacha ónár n-oibríochtaí féin faoin mbliain 2030, le laghdú 50% faoi 2025. Tá monatóireacht agus tuairisciú á dhéanamh againn go leanúnach ar an dul chun cinn seo agus táimid ar an mbóthar ceart chun ár sprioc 2025 a bhaint amach.
An t-aistear go dtí seo
Is saincheist ríthábhachtach dúinn é an t-athrú aeráide mar go n-aithnímid an ról atá le himirt againn maidir leis an lorg a fhágfaimid ar an gcomhshaol agus inár bpobail a íoslaghdú ionas go mbeidh rath orthu sna na glúine atá le teacht. Chomh maith le gealltanais a dhéanamh agus pleananna a chruthú, tá gníomhartha ar son na haeráide á seachadadh go leanúnach ag An Post agus táimid ar an mbóthar ceart le laghdú faoina leath faoi 2025. Rinneamar laghdú 3,395 tonna carbóin ar ár n-astaíochtaí in 2022, arb ionann é agus laghdú 12% bliain ar bhliain agus laghdú 35% ó 2009.
Gnéscéal - Ár bhFlít
Le dícharbónú ár bhflít is féidir linn tionchar suntasach a imirt ar an gcomhshaol. Chuir leictriú leanúnach ár bhflít agus tabhairt isteach breosla HVO le laghdú 2,683 tona carbóin ar astaíochtaí ár bhflít iompair Scóip 1. Ina theannta sin, tháinig laghdú 11% ar astaíochtaí ó iompar ar bhóthar in 2022 de réir mar a taistealaíodh 2.7 milliún km breise inár bhflít leictreach agus ní bhíonn aon astaíochtaí NOx ó fheithiclí leictreacha. In 2022 bhí seachadtaí astaíochtaí nialasacha freisin againn i ngach ceann de na 6 chathair mhóra in Éirinn - Baile Átha Cliath, Port Láirge, Corcaigh, Luimneach, Gaillimh agus Cill Chainnigh.
Gnáthrud a dhéanamh den mhaireachtáil inbhuanaithe
Táimid tiomanta do thionchar dearfach a imirt ar ár bpobail trí dheiseanna laethúla a chruthú chun gnáthrud a dhéanamh den mhaireachtáil inbhuanaithe do chách in Éirinn. In 2022 ba sinne an chéad ghnó in Éirinn rinne gealltanais éagsúla mar chuid de thionscnamh “Beat the Peak” ESB Networks, mar ar chuireamar roinnt beart i bhfeidhm thar thréimhse an gheimhridh chun ár mbuaic-ídiú leictreachais a laghdú go suntasach, agus ag an am céanna ár seirbhísí a chothabháil go hiomlán le linn an ama is gnóthaí den bhliain.
Ag breathnú chun cinn
Tá ceann de na flíteanna feithiclí is mó in Éirinn á oibriú ag An Post agus tá os cionn dhá mhilliún troigh cearnach á bhainistiú inár bpunann réadmhaoine. Ag croílár ár straitéise dícharbónaithe tá an t-aistriú go flít iompair inbhuanaithe agus fuinneamh in-athnuaite. Leanfaimid freisin leis an bpróiseas chun foirgnimh a iarfheistiú laistigh dár bpunann réadmhaoine, rátálacha BER A fheabhsú agus tacú le tionscnaimh inbhuanaithe.
